ယုံကြည်မှုနှင့် သိမှု

Faith, as well intentioned as it may be, must be built on facts, not fiction--faith in fiction is a damnable false hope.
(Thomas Alva Edison)
ယုံကြည်မှုကို ရည်ရွယ်ရင်းအတိုင်း အချက်အလက်တွေပေါ်မှာပဲ တည်ဆောက်ရမယ်။ လုပ်ယူလို့မရဘူး။ လုပ်ယူထားတဲ့ ယုံကြည်မှုဟာ အမှားဖြစ်ဖို့ နီးစပ်တယ်။
(ထောမတ်စ် အယ်လ်ဗာ အဲဒိဆန်)

ကျနော်တို့နေ့စဉ်ဘ၀မှာ ပြောနေတဲ့စကားတွေကို ခွဲခြမ်းစိတ်ဖြာလိုက်မယ်ဆိုရင် အချို့စကားတွေဟာ သိမှုဆိုတဲ့ အုပ်စုထဲမှာပါမယ်။ အချို့စကားတွေကတော့ ယုံကြည်မှုဆိုတဲ့ အုပ်စုထဲမှာပါသွားမယ်။ တစ်နည်းအားဖြင့် ကျနော်တို့ပြောတဲ့စကားအများစုဟာ ယုံကြည်မှုကို အခြေခံပြီး သို့မဟုတ် ယုံပြီးပြောတဲ့စကားတွေနဲ့ သိမှုကိုအခြေခံပြီး သို့မဟုတ် သိပြီးပြောတဲ့စကားရယ်လို့ ယေဘုယျအုပ်စု နှစ်မျိုး ကျနော်ခွဲခြားပါတယ်။

လူအတော်များများဟာ ဒီဝေါဟာရ နှစ်မျိုးကို အဓိပ္ပါယ် တူသယောင်ယောင် နားလည်နေကြပါတယ်။ ဘာသာရေးစာပေတွေမှာ ဒီစကားနှစ်လုံးဟာ အတော်လေးကို အဓိကကျပါတယ်။ သိပ်အရေးကြီးပါတယ်။ ဘာသာရေးအားလုံးကို ဆိုလိုပါတယ်။ ကျနော်တို့ဗုဒ္ဓဘာသာမှာ ဒီစကားနှစ်လုံးကို သဒ္ဓါ နဲ့ ပညာ လို့ဆိုပါတယ်။ သဒ္ဓါ ဆိုတာ (မှတ်ချက်၊ ဒဒွေးနဲ့ သဒ္ဒါ ဆိုတာ Grammar ကိုပြောပါတယ်။ ကွဲပြားချက်ကို သတိပြုပါ။) ယုံကြည်မှုပါ။ အဓိကအားဖြင့် ရတနာသုံးပါးနဲ့ ကံ၊ ကံရဲ့အကျိုးကို ယုံကြည်မှုမျိုးကို ခေါ်ပါတယ်။

နောက်ပိုင်းမှာတော့ ကျနော်တို့ မြန်မာစကားအဖြစ်အမွေးစားခံလိုက်ရပြီး အချင်းချင်းကြည်ဖြူတဲ့နေရာမှာလဲ အဓိပ္ပါယ်တစ်မျိုးနဲ့ သုံးစွဲလာတာ တွေ့ရပါတယ်။ ဒါကြောင့် (သဒ္ဓါ) သဒါလို့ပေးတာ/ကျွေးတာ။ အချစ်(သဒ္ဓါ) သဒါ စသည်အားဖြင့် အဓိပ္ပါယ်အမျိုးမျိုးနဲ့ သုံးစွဲလာကြပါတယ်။ မှားတယ်လို့မဆိုချင်ပေမဲ့ မူရင်းအဓိပ္ပါယ်မဟုတ်တာကိုတော့ နားလည်ထားဖို့ လိုအပ်ပါတယ်။ ဘာဖြစ်လို့ မှားတယ်လို့ မဆိုချင်သလဲ ဆိုရင် ရှေးခေတ်သဒ္ဒါဆရာကြီးတွေ ကိုယ်တိုင်ကိုက သဒ္ဒါ (grammar) ဆိုတာ လူတွေသတ်မှတ်တဲ့အတိုင်းပဲ ပြီးစီးရတယ် လို့ မိန့်ဆိုခဲ့ကြလို့ပါပဲ။

နောက်တစ်မျိုးက ပညာ။ ဒီစကားလုံးကိုလဲ ကျနော်တို့ဗမာစကားအဖြစ်မွေးစားလိုက်ပါပြီ။ သူ့ရဲ့မူရင်းအဓိပ္ပါယ်က အကြောင်းအရာ တစ်ခုခုကို အသေးစိမ့်သိခြင်းလို့ အဓိပ္ပါယ်ရပါတယ်။ သို့သော်လဲ တော်ရုံကိစ္စတွေမှာ သိခြင်း/မသိခြင်းတွေကိုလဲ ဝေါဟာရကျဉ်းအောင်ဆိုပြီး ပညာဆိုတဲ့စကားနဲ့ပဲ ပြောလိုက်ရပါတယ်။ ဒါကြောင့် ဘွဲ့ရပညာတတ် ဆိုတဲ့ဗမာစကားစုတွေ ထွက်ပေါ်လာခြင်းဖြစ်ပါတယ်။ တကယ်တော့ ဘွဲ့ရတာဟာ ပညာတတ်တာနဲ့ တခြားစီပါပဲ။ ဒါပေမဲ့ နားထောင်တဲ့လူက ပြောတဲ့လူရဲ့ဆိုလိုရင်းကို နားလည်ရေးသာအဓိကဖြစ်တဲ့အတွက် စကားလုံးရဲ့ မူရင်းအဓိပ္ပါယ်နဲ့ လိုက်တွက်ကပ်ပြီး အမှား/အမှန် ငြင်းခုန်နေစရာ မလိုဘူးဆိုတာကို ကျနော်ပြောချင်ပါတယ်။

အဲဒီလို ဘာသာရေးစာပေရှုထောင့်နဲ့ ကြည့်ရင်တော့ ဒီစကားလုံးတွေရဲ့ အဓိပ္ပါယ်ဟာ တစ်ခုနဲ့တစ်ခု အတော်ကြီးကွဲပြားခြားနားမှု ရှိနေတာကို တွေ့ရမှာ ဖြစ်ပါတယ်။ ဒါပေမဲ့ ကျနော်တို့ နေ့စဉ်သုံးစကားအဖြစ်ပြောင်းသုံးလိုက်တဲ့ အခါကျတော့ အဓိပ္ပါယ် တူသယောင်ယောင်ဖြစ်သွားတတ်ပါတယ်။ အဲဒါကြောင့် Belief and Knowledge သို့မဟုတ် ယုံကြည်မှု နဲ့ သိမှု ဆိုတဲ့စကားလုံးတွေကို အဓိပ္ပါယ်တူသယောင်ယောင်သုံးမိတတ်ပါတယ်။ ဒါနဲ့ပတ်သက်ပြီး ကျနော့်ဆရာပြောပြတဲ့ တီထွင်ပါရဂူကြီး Thomas Alva Edison (ထောမတ်စ် အယ်လ်ဗာ အဲဒိဆန်) ရဲ့ အယူအဆလေးတစ်ခုကို တင်ပြလိုက်ပါတယ်။

တစ်ခါတုန်းက (ဗမာခေါ် သောမတ်အယ်ဒီဆင်) ထော်မတ်စ်အယ်လ်ဗာအဲဒိဆန်ကို ရင်းနှီးတဲ့ သူ့သူငယ်ချင်းတစ်ယောက်က မေးသတဲ့။ ကိုယ့်လူကြီး ယုံကြည့်မှုနဲ့ သိမှု ဘယ်လိုများကွာခြားပါသလဲ ပေါ့။ အဲဒီမေးခွန်းကို အဲဒိဆန်က ချက်ချင်းမဖြေဘူး။ မေးခွန်းပြန်ထုတ်လိုက်တယ်။
အဲဒိဆန်။ ကိုယ့်လူမှာ ဇနီးရှိတယ်နော်။
သူငယ်ချင်း။ ရှိပါ့ဗျာ။
အဲဒိဆန်။ ကလေးရောဗျာ။
သူငယ်ချင်း။ ရှိပါသော်ကော။
အဲဒိဆန်။ ဒါဆို ကိုယ်ထပ်မေးမယ်။ ကလေးတွေအပေါ်မှာ ကိုယ့်လူရဲ့အမြင်နဲ့ ကိုယ့်လူမိန်းမရဲ့အမြင်လေးပြောစမ်းဗျာ။
သူငယ်ချင်း။ ကျုပ်ကတော့ အဲဒီကလေးတွေကို ကျုပ်ကလေးတွေလို့ ယုံတယ်ဗျာ။
အဲဒိဆန်။ ယုံရုံပဲလား။ သေသေချာချာမသိဘူးလား။
သူငယ်ချင်း။ ဒါတော့ ဘယ်ပြောနိုင်မလဲဗျာ့။ ကိုယ့်ဗိုက်ထဲက မွေးထားတာမှ မဟုတ်တာပဲ။ ပြီးတော့ ဟဲဟဲ---။
အဲဒိဆန်။ ဒါဆို ကိုယ့်လူမိန်းမကရောဗျာ။
သူငယ်ချင်း။ သူကတော့ သူကိုယ်တိုင်မွေးထားတာဆိုတော့ အဲဒီကလေးတွေကို သူ့ကလေးမှန်း အသေအချာသိတာပေါ့ဗျာ၊ ကိုယ့်လူကလဲ--။
အဲဒိဆန်။ အဲဒါပဲပေါ့ သူငယ်ချင်း။ ယုံကြည့်မှုနဲ့ သိမှုရဲ့ ကွာဟချက်တွေဟာ။ ယုံကြည့်မှုက မသေချာဘူး။ သိမှုက သေချာတယ်။

နောက်တစ်ခု ကျနော်ကြားဖူးထားတာ ရှိသေးတယ်။ အဲဒါကတော့ ကျနော်တို့မြန်မာနိုင်ငံဗုဒ္ဓဘာသာလောကမှာ ထင်ရှားတဲ့ ဂိုဏ်းကြီးနှစ်ဂိုဏ်းထဲက တစ်ဂိုဏ်းဖြစ်တဲ့ ရွှေကျင်ဂိုဏ်းကြီးကို စတင်တည်ထောင်ခဲ့တဲ့ ရွှေကျင်ဆရာတော်ဘုရားကြီးအကြောင်း။ ဆရာတော်ဘုရားရဟန်းပျိုဘ၀တုန်းက ၀ိနည်းအလွန်လေးစားတဲ့အတွက် သူစာသင်တဲ့ မြို့ကနေ သူ့ရွာပြန်ရောက်တဲ့အခါတိုင်း လိုချင်တာမှန်သမျှ အမေ့ဆီမှာပဲ တောင်းသတဲ့။ သူ့အဖေဆီ တစ်ခါမှ မတောင်းဘူး ဆိုပဲ။

တစ်နေ့တော့ အဲဒါကို သတိပြုမိတဲ့ သူ့အဖေက မေးသတဲ့။ ကိုယ်တော်၊ ကိုယ်တော်ရွာပြန်ရောက်တိုင်း လိုချင်တာရှိရင် ကိုယ်တော့်အမေ့ဆီချည်းတောင်းတာပါလား။ ကိုယ်တော့်အဖေဖြစ်တဲ့ တပည့်တော်ဆီတော့ တစ်ခါမှ တောင်းသံမကြားဖူးဘူး။ အဲလိုပြောတော့ ဆရာတော်က အမိန့်ရှိသတဲ့။ အမေက သေချာတယ်၊ အဖေက သိပ်မသေချာဘူး လို့။ ဒါနဲ့ အဘိုးကြီး စိတ်ထွက်သွားပြီး ဒါဆိုလဲ သေချာ/မသေချာသိရအောင် ကိုယ်တော့်အမေသာ မေးကြည့်တော့ လို့ ပြောဆိုပဲ။

ဒီစကားကို ဘာသာရေးနဲ့ မရင်းနှီးတဲ့လူတွေ နားလည်အောင် နည်းနည်းထပ်ရှင်းဖို့လိုမယ်ထင်တယ်။ ရဟန်းတော်များ ကျင့်သုံးရတဲ့ စည်းကမ်းဥပဒေတွေထဲမှာ ဆွေမျိုးမတော်တဲ့ လူတွေဆီမှာ အလိုရှိတဲ့အခါ ပြောပါဘုရားလို့ သူတို့ကိုယ်တိုင် ဖိတ်မထားဘူးဆိုရင် မတောင်းရဘူး၊ တောင်းရင် အပြစ်ရှိစေ၊ ဆိုပြီး သတ်မှတ်ထားတဲ့ ဥပဒေတစ်ခုရှိပါတယ်။ အဲဒီဥပဒေအရ အဖေဆိုတာ လွဲမှားနိုင်တဲ့အတွက် ဆရာတော်က ဥပဒေကို လေးစားတဲ့အနေနဲ့ ဘယ်တော့မှ မတောင်းဘူးတဲ့။ အံ့သြစရာပဲ။

ဒီလောက်ဆိုရင် စာဖတ်သူလဲ အဲဒီစကားလုံးတွေရဲ့ အဓိပ္ပါယ်ကွာဟချက်ကို ကောင်းကောင်းနားလည်သွားပြီလို့ ယူဆပါတယ်။ ကျနော်တို့ဟာ ယုံတယ်ဆိုတာနဲ့တင် လက်ခံလို့ မဖြစ်ပါဘူး။ သိအောင်ကြိုးစားဖို့ တကယ်လိုအပ်ပါတယ်။ ယုံကြည်မှုဟာ မခိုင်မာပါဘူး။ သိမှုကတော့ ခိုင်မာပါတယ်။ ယုံပြီး လက်ခံတာထက်၊ သိပြီးလက်ခံတာက ပိုကောင်းပါတယ်။ ဒီနေရာမှာ ကျနော့်စာဖတ်နေသူဟာ မိန်းကလေးတစ်ယောက်ဖြစ်ရင် ကြုံတုန်းလေး ဆရာလုပ်ချင်တယ်ဗျာ။ ယုံမှတ်လို့ ပုံအပ်မိပါတယ် ဆိုတဲ့ သီချင်းကြားဖူးတယ်နော်။ ယုံရုံနဲ့တော့ ပုံမအပ်ဖို့ သတိပေးချင်တယ်။ ဒုက္ခရောက်မှာစိုးလို့။ သိအောင်လုပ်နော်။ မဟုတ်ရင် မလွယ်ဘူး၊ ခေတ်ကြီးက။ ကောင်လေးတွေကတော့ သူတို့ကို စားပေါက်ပိတ်အောင်လုပ်တယ်ဆိုပြီး ကောင်းချည်းပေးမှာ သေချာတယ်။ သိနေတယ်လေ။