Thursday, February 12, 2009

သိမှုသဘောတရား (၂)


နောက်ဆုံးအဆင့်ဖြစ်တဲ့ သိမှုသဘောတရားကတော့ knowledge သို့မဟုတ် Wisdom ခေါ် ပညာအသိဖြစ်ပါတယ်။ ဒီသိမှုမှာ
(၁) Recollection အာရုံကို ပြန်လည်စုဆောင်းခြင်းသဘောတရား
(၂) Reflection အာရုံကို ပြန်လည်သုံးသပ်ခြင်းသဘောတရား
(၃) Reasoning သက်ဆိုင်ရာအာရုံရဲ့ယုတ္တိကိုတွေးဆခြင်းသဘောတရား ဆိုတဲ့ R သုံးလုံးပါနေတာ တွေ့ရမှာဖြစ်ပါတယ်။ ဒါကြောင့် တစ်စုံတစ်ခုသောအာရုံကို ဂဂနနသိတယ်ဆိုတဲ့ အသိဟာ သညာအသိ၊ ၀ိညာဉ်အသိတွေတုန်းကလို အာရုံရရခြင်း ပစ္စပ္ပန်တည့်တည့်မှတ်သားမှု၊ သိမှုမျိုးမဟုတ်ပါဘူး။ သညာ၊ ၀ိညာဉ်တွေနဲ့ မှတ်သားထား၊ သိထားပြီးဖြစ်တဲ့ သာမန်အသိတွေကို ထပ်ဆင့်စိစစ်ပြီးမှ သိလာရတဲ့ အသိတစ်မျိုးဖြစ်ပါတယ်။ ဒီအသိကို နားလည်သဘောပေါက်မှုလို့ ဝေါဟာရဖလှယ်နိုင်ပါတယ်။ ဒါကြောင့် ပညာဆိုတာ နားလည်သဘောပေါက်ခြင်း understanding ကိုပြောပါတယ်။

ဒီလိုနားလည်တဲ့နေရာမှာလဲ စာပေမှာလာတဲ့အတိုင်း တင်ပြရရင် သုံးမျိုး သုံးဆင့်ကွဲပြားပါသေးတယ်။ အဲဒါတွေကတော့----
(၁) သုတမယဉာဏ်= understanding gained from general study
(၂) စိန္တာမယဉာဏ်= knowledge obtained from reasoning
(၃) ဘာဝနာမယဉာဏ်= wisdom possessed from experience

နံပါတ်တစ်ဖြစ်တဲ့ အသိဉာဏ်မျိုးကို စာပေလေ့လာမှုတွေ၊ သင်ယူမှုတွေကရပါတယ်။ ဒီအသိဟာ မိမိလေ့လာရတဲ့ အကြောင်းအရာဘာသာရပ်အလိုက် အမျိုးမျိုးရှိတဲ့အတွက် ခိုင်မာတဲ့အသိဉာဏ်အနေနဲ့ တထစ်ချမှတ်ယူလို့မဖြစ်နိုင်ပါဘူး။ အကြောင်းအရာတစ်မျိုးတည်းသည်ပင် တင်ပြသူကွဲပြားမှုကြောင့် ကွဲပြားနိုင်ပါသေးတယ်။ နောက်တစ်ခါ တင်ပြသူတစ်ဦးတည်းသည်ပင် သူ့အချိန်ကာလအားလျှော်စွာ ရရှိလာတဲ့ အသိပြောင်းလဲမှုကြောင့် ရှေ့နောက်တင်ပြပုံကွဲလွဲနိုင်ပါတယ်။ ဒါ့အပြင် တင်ပြသူ ကျမ်းဆရာရဲ့ အကိုးသာဓကတွေကွဲပြားမှုကြောင့် ဆရာတစ်ဦးတည်းပင်ဖြစ်လင့်ကစား ရှေ့နောက်အဆိုကွဲပြားနိုင်ပါတယ်။ ဒါကြောင့် စာပေအသိဟာ မခိုင်မာပါဘူး။ ဒီသဘောကို ပေါ်လွင်အောင် ရှေးဆရာများကလဲ “တစ်ကျမ်းတတ်ရုံ၊ ကျမ်းမစုံ၊ အာဂုံတယ်ပြီး မကိုးနဲ့” လို့ ဆိုခဲ့ကြပါတယ်။

နှစ်နံပါတ်အသိဉာဏ်ကတော့ စဉ်းစားဆင်ခြင်မှုကို အခြေခံပါတယ်။ ဒီနေရာမှာ စဉ်းစားဆင်ခြင်မှုဆိုတာလဲ Form of Idea လို့ခေါ်တဲ့ အတွေးပုံသဏ္ဌာန်တစ်ခုလိုအပ်ပါတယ်။ အသားလွတ်ကြီးဘယ်သူမှ မစဉ်းစားတတ်ကြပါဘူး။
(၁) thinkable object= စဉ်းစားစရာအာရုံ တစ်ခုခုရှိခြင်း၊
(၂) ability to think= စဉ်းစားနိုင်စွမ်းရှိခြင်းနဲ့
(၃) to think= စဉ်းစားခြင်း တို့ရှိနေဖို့လိုပါတယ်။
စဉ်းစားစရာတော့ရှိတယ်၊ ဒါပေမဲ့ စဉ်းစားနိုင်စွမ်းမရှိဘူးဆိုရင် စိန္တာမယဉာဏ်အဆင့်မရောက်ပါဘူး။ အဲဒီအဆင့်ရောက်ဖို့ အင်္ဂါသုံးမျိုးစလုံးလိုအပ်ပါတယ်။ အဲဒီအင်္ဂါသုံးချက်နဲ့ညီရင် အဖြေတစ်ခုခုထွက်လာပါတယ်။ အဲဒီအဖြေဟာ စိန္တာမယဉာဏ်ရဲ့ ရလာဒ်ပါပဲ။

ဥပမာ၊ သုမေဓာသူဌေးသားက သူ့မိဘတွေကွယ်လွန်သွားတဲ့အခါ ကျန်ရစ်တဲ့ပစ္စည်းပုံကြီးကိုကြည့်ပြီး “ငါ့မိဘတွေဟာ ပစ္စည်းတွေကို ရှာရုံသာရှာတတ်ကြပြီး ယူမသွားတတ်ကြဘူး၊ ငါကတော့ ဒီပစ္စည်းအားလုံး ယူသွားမယ်” လို့စဉ်းစားပါတယ်။ အဲဒီစဉ်းစားမှုထဲက သူဌေးသားတောထွက်၊ ရသေ့ဝတ်သွားခြင်း ဆိုတဲ့ အဖြေတစ်မျိုးထွက်လာပါတယ်။ အသေးစိမ့်ကြည့်မယ်ဆိုရင် သူ့စဉ်းစားမှုထဲမှာ အောက်ပါအချက်အလက်တွေပါနေတာ တွေ့ကြရမှာပါ။
(၁) ငါ့မိဘနှစ်ပါးသေဆုံးသွားရှာပြီ။
(၂) ပစ္စည်းများစွာ ကျန်ရစ်ခဲ့ပြီ။
(၃) မိဘနှစ်ပါးသေသလို ငါလဲတစ်နေ့ သေရမည်။
(၄) ငါသေရင်လဲ ငါ့မိဘတွေလို ပစ္စည်းတွေကို ထားခဲ့ရမည်။
(၅)ဒီတော့ ဒီပစ္စည်းတွေကို အလှူပေးပစ်ပြီး ကုသိုလ်ကောင်းမှုတွေကိုပဲ ငါ့နဲ့အတူတမလွန်ကို ယူသွားမည်။

ဒီအတွေးဟာ သာမန်လူတွေမှာလဲ ဖြစ်နိုင်ပါတယ်။ ဒါပေမဲ့ လိုက်လုပ်ဖို့တော့ ခဲရင်းမယ်ထင်ပါတယ်။ ဘာ့ကြောင့်လဲဆိုတော့ တွေးတဲ့အဆင့်ခြင်းမတူညီလို့ပါပဲ။ ကျနော်တို့မှာလဲ ဒီလိုအတွေးမျိုးတွေ ရှိနေတာပါပဲ၊ အနည်းအများဆိုသလို တွေးလဲတွေးဖူးကြတာပါပဲ။ ဒါပေမဲ့ ကျနော်တို့တွေးတာက အားနည်းတယ်။ ဒါကြောင့် သိသာတဲ့ ရလာဒ်မပေါ်ဘူး။ သုမေဓာရဲ့အတွေးက အားကောင်းတယ်။ ဘယ်လောက်ထိကောင်းလဲဆိုရင် သူပိုင်ဆိုင်သမျှတွေ စွန့်လွှတ်ပြီး တောထွက်သွားရလောက်တဲ့အထိ ကောင်းတာ။ သုမေဓာရဲ့အဲဒီလိုအတွေးမျိုးကြောင့် ကျနော်တို့ဟာ သူဘုရားဖြစ်လာတဲ့အခါ ဟောကြားခဲ့တဲ့တရားတွေကို နာယူလို့မကုန်ဖြစ်နေကြရတာပါ။ ဒါဟာ စိန္တာမယဉာဏ်ရဲ့ရလာဒ်ပဲလို့ ကျနော်ကတော့ဆိုချင်ပါတယ်။ ဒီလိုတွေးပုံမျိုးကို အနောက်တိုင်းဖီလိုဆိုဖီမှာ
(၁)Deduction=(တြိယုတ္တိဆင်ခြေ) သုံးဆင့်တွေးနည်းနဲ့
(၂)Induction=(ဒွိယုတ္တိဆင်ခြေ) နှစ်ဆင့်တွေးနည်း လို့သုံးပါတယ်။

ဥပမာ---
(၁) လူသားမှန်သမျှ သေကြရမည်။ (ပထမအာဘော်)
(၂) ကိုမင်းထက်သည် လူသားဖြစ်သည်။(ဒုတိယအာဘော်)
-------------------------------------------
(၃) ထို့ကြောင့် ကိုမင်းထက်သည် သေရမည်။ (ကောက်ချက်)

တစ်နဲ့နှစ်ကို အခြေခံပြီးတော့ သုံးမှာအဖြေထုတ်တဲ့တွေနည်းပါ။ ဒီတွေးနည်းဟာ အခါခပ်သိမ်းမှန်ကန်တဲ့ တွေးနည်းတော့မဟုတ်ပါဘူး။ ယူဆပုံမှန်ပြီးတော့ ကောက်ချမှာ လွဲသွားတဲ့ တွေးနည်းတွေလဲ အများကြီးပါပဲ။
ဥပမာ---
(၁) မိန်းမမှန်သမျှ ပန်းကို ချစ်သည်။ (ပထမအာဘော်)
(၂) ခင်ခင်သည် မိန်းမတစ်ယောက်ဖြစ်သည်။ (ဒုတိယအာဘော်)
----------------------------------------------
(၃) ထို့ကြောင့် ခင်ခင်သည် ပန်းကိုချစ်သည်။ (ကောက်ချက်)

ဒီတွေးနည်းမှာ နံပါတ်တစ်ဖြစ်တဲ့ Premises အာဘော်ဟာ အရေးကြီးကြောင်း သတိထားမိမှာပါ။ တကယ်လို့ မိန်းမမှန်သမျှ ပန်းကိုချစ်သည် ဆိုတဲ့ အာဘော်သာ တထစ်ချမှန်တယ်ဆိုရင် မိန်းမတစ်ယောက်ဖြစ်တဲ့ ခင်ခင်ဟာ ပန်းကိုချစ်တယ်ဆိုတဲ့ ကောက်ချက်ဟာလဲ မှန်ရမှာဖြစ်ပါတယ်။ ဒါပေမဲ့ အာဘော်ထိုးကတည်းက လွဲလာတဲ့အတွက်ကြောင့် ကောက်ချက်မှာလဲ လွဲသွားရတာပါ။ ဒါကို မှန်အောင် “မိန်းမအများစုသည် ပန်းကို ချစ်ကြသည်” လို့ ယေဘုယျသဘောပါစေပြီး ထိုးရမှာဖြစ်ပါတယ်။ ဘာ့ကြောင့်လဲဆိုတော့ လောကမှာ သေခြင်းတရားတစ်မျိုးလောက်ပဲ သေချာပါတယ်။ ကျန်တာတွေကတော့ ယေဘုယျချည်းပါပဲ။ ဒါကြောင့် အမှန်တရားနဲ့နီးစပ်အောင်တွေးတောတဲ့အခါမှာ ယေဘုယျသဘောကို ထည့်ပြီး အာအော်ထိုးရပါတယ်။

ဒွိယုတ္တိလို့ခေါ်တဲ့ နှစ်ဆင့်တွေးနည်းကတော့ Premises လို့ခေါ်တဲ့ အာဘော်တစ်ချက်နဲ့ Conclusion လို့ခေါ်တဲ့ ကောက်ချက် တစ်ချက်ပါပဲ။ အဆိုတစ်ခုကိုကြည့်ပြီး အဖြေထုတ်တဲ့နည်းပါ။ ဥပမာ--
(၁) တွေ့သမျှ ကျီးကန်းအားလုံးသည် အမည်းချည်းသားဖြစ်သည်။ (အာဘော်)
--------------------------------------------------------------------
(၂) ထို့ကြောင့် ကျီးကန်းမှန်သမျှ အမည်းချည်းသာဖြစ်သည်။ (ကောက်ချက်)

ဒီအဖြေဟာ ကျီးဖြူတစ်ကောင်ကောင်ကို မတွေ့ရမချင်း မှန်နေမှာတော့ သေချာပါတယ်။ ဒါပေမဲ့ ဟောဒီကျယ်ဝန်းလှကမ္ဘာကြီးထဲမှာ ကျီးဖြူမရှိဘူးလို့ ဘယ်သူသိနိုင်မှာလဲ။ ဒီလိုအဆိုမျိုးကို တစ်ထစ်ချ မှတ်သားလို့ မဖြစ်နိုင်ပါဘူး။ ဒါကြောင့် စိန္တမယဉာဏ်တစ်မျိုးဖြစ်တဲ့ ဒွိယုတ္တိဆင်ခြေဟာလဲ အားကိုးလောက်တဲ့ အသိမျိုးမဟုတ်သေးကြောင်း နားလည်နိုင်ပါတယ်။

နောက်ဆုံးအသိဉာဏ်အဆင့်ကတော့ ဘာဝနာမယဉာဏ်ဖြစ်ပါတယ်။ ကိုယ်တွေ့အသိလို့တိုက်ရိုက်ဘာသာပြန်နိုင်ပါတယ်။ ဒီအသိဟာလဲ “ခဲမှန်ဖူးသော စာသူငယ်” ဆိုတဲ့ ကိုယ့်တွေ့အသိမျိုးမှသည် သစ္စာလေးပါးကို သိတဲ့ကိုယ်တွေ့အသိတိုင်အောင် ကျယ်ဝန်းလှပါတယ်။ စာပေမှာတော့ တရားဘာဝနာရေးရာမှာပဲ သုံးတာများပါတယ်။ ဒါပေမဲ့ ဒီလိုပြောရင် ဒီအသိဟာ နေ့စဉ်ဘ၀နဲ့ မဆိုင်သလိုဖြစ်သွားပါလိမ့်မယ်။ ဒါကြောင့် ကျနော်ကတော့ နေ့စဉ်ဘ၀မှာလဲ ဒီလိုကိုယ်တွေ့အသိမျိုးတွေရှိနေကြောင်း၊ အဲဒီအသိတွေကိုလဲ ဘာဝနာမယဉာဏ်လို့ ခေါ်ချင်ခေါ်နိုင်ကြောင်း တင်ပြလိုပါတယ်။ ဒီလိုယူဆလိုက်တဲ့အတွက် ဒီဉာဏ်ရဲ့ နယ်ပယ်ဟာ အတော်လေးကို ကြီးကျယ်သွားပါတယ်။

ဒီဉာဏ်ကို အတွေ့အကြုံကရတယ် လို့ ယေဘုယျနားလည်ထားဖို့လိုပါတယ်။ အဲဒီလို အတွေ့အကြုံက ရတဲ့အတွက် စာပေသင်ကြားမှုတွေ၊ ဆင်ခြင်စဉ်းစားမှုတွေနဲ့ အတော်များများ မသက်ဆိုင်တော့ပါဘူး။ အဲဒီတော့ ဘယ်သူမဆို ဒီအသိမျိုးကို သူတို့သက်ဆိုင်ရာဘ၀ထဲက ထုတ်ယူနိုင်ပါတယ်။ ဒီအသိဉာဏ်ရဲ့ နောက်ဆုံးအဆင့်ကတော့ သစ္စာလေးပါးကို ထိုးထွင်းသိမြင်ခြင်းပါပဲ။ ဘယ်သောအခါမှ ပြောင်းလဲခြင်းမရှိတော့သောသိခြင်းဖြင့် သိသွားတယ် လို့ဆိုလိုပါတယ်။ ဒါကတော့ ဘာဝနာမယဉာဏ်ရဲ့အထွတ်အထိတ်အဆင့်ပါ။

ကျနော်တစ်ခုစဉ်းစားမိတာပြောရမယ်ဆိုရင် ဒီအသိမှာ အောက်ပါအချက်အလက်တွေ ပါဝင်နေတာတွေ့ရပါတယ်။
(၁) having experience=အတွေ့အကြုံရှိခြင်း
(၂) filtering knowledge out of it=ယင်းမှ အသိကို ထုတ်ယူခြင်း
(၃) unchangeablity= မပြောင်းလဲခြင်း စသည်ဖြစ်ပါတယ်။

တစ်ခါတလေ ကျနော်တို့နေ့စဉ်ဘ၀မှာ အတွေ့အကြုံကတော့ ရှိပါရဲ့။ သက်ဆိုင်ရာလူက သူ့အတွေ့အကြုံကို မထုတ်ယူတတ်ရင် သူ့အတွက် အဲဒီအတွေ့အကြုံဟာ အလကားပါပဲ။ ဒါကြောင့် သူဟာ အဲဒီအသိနဲ့ပတ်သက်ပြီး ပြောင်းလဲနိုင်တယ်။ အတွေ့အကြုံရှိပေမဲ့ အသိကိုမထုတ်ယူတတ်တဲ့အတွက် အသိပြောင်းလဲနေသေးသမျှ အဲဒီလူရဲ့အသိဟာ ဘယ်သောအခါမှ ဘာဝနာမယဉာဏ်အဆင့်မရောက်နိုင်ပါဘူး။ ဒါဖြစ်ရင် အဲဒီအသိကို ဘယ်လိုနာမည်ပေးမလဲ၊ ကျနော်ကတော့ အတွေ့အကြုံလို့ပဲခေါ်ချင်ပါတယ်။ လူတိုင်းမှာ အနည်းအများဆိုသလို ဘ၀အတွေ့အကြုံတွေ ရှိကြပါတယ်။ ဒါပေမဲ့ ၉၀% ရာခိုင်းနှုံးလောက်သော လူတွေဟာ ကိုယ့်အတွေ့အကြုံကို ပြန်လည်မသုံးချတတ်ကြပါဘူး။ ၁၀%ရာခိုင်နူံးလောက်ပဲရှိပါတယ်။ ဒါကြောင့် အဲဒီလောက်အရေအတွက်ရှိတဲ့လူတွေပဲ ဘ၀မှာ အထက်တန်းရောက်လာကြရတာပါ။ ဒါကို ဘာဝနာမယဉာဏ်ရဲ့ ရလာဒ်ပဲလို့ ကျနော်ကတော့ ဆိုချင်ပါတယ်။ ဒါကတော့ ကျနော်လေ့လာထားတဲ့အထဲက အနည်းငယ်မျှ ဆွေးနွေးကြည့်တာပါ။ စစ်မှန်တဲ့အသိဉာဏ်မျိုးပိုင်ဆိုင်နိုင်ကြပါစေ။
(ဆောရီးဗျာ၊ နည်းနည်းရှည်သွားတယ်။)

No comments: