မြန်မာ့မြေပေါ်မှ ကမ္ဘာ့အံ့ဘွယ်လောင်းလျာ

“တိုင်းရင်းသားစည်းလုံးညီညွတ်ရေး ဒို့အရေး” ဆိုတဲ့
နအဖတို့ရဲ့ ဆောင်ပုဒ်ကို “အမျိုးသား (အမျိုးသမီးလဲပါတယ်နော်) စည်းလုံးညီညွတ်ရေး ဒို့အရေး” လို့မှန်မှန်ကန်ကန်ပြုပြင်ပြီးသကာလ အဟမ်း---အဟမ်း---အရေးထဲ ချွဲကလဲ ကပ်လိုက်သေးသဗျာ့---မဲပေးကြပါကုန်စို့---လို့ ကမ္ဘာ့အရပ်ရပ်မှာ မှီတင်းနေထိုင်ကြကုန်သော အသက် (၁၃)နှစ်မှအစ မြန်မာနိုင်ငံသားများအားလုံးကို (ယမ်ယမ်ခေါက်ဆွဲပြုတ်သလို) အနူးအညွတ်ပန်ကြားအပ်ပါသည် ခင်ဗျား-----။

ဒီလိုဗျာ့---။ အခု ကျနော်ကြေညာနေတာ တစ်မျိုးမထင်နဲ့။ ၂၀၁၀-ခုနှစ် (အခုကတည်းက ဘယ်သူဘယ်ဝါဆိုတာ အဆင်သင့်ရွေးထားပြီးသော) ရွေးကောက်ပွဲအတွက် လှုပ်ဆော်နေတာမဟုတ်ဘူးနော်။ အဲဒီအတွက်တော့ လှုပ်ဆော်တဲ့လူ အာညောင်းရုံပဲအဖတ်တင်မယ်။ သူတို့က ရွေးထားပြီးသား။ ကျနော်ပေးစေလိုတဲ့ မဲက အဲဒါနဲ့ဘာမှမဆိုင်ဘူး။ ကမ္ဘာ့အလယ်မှာ မြန်မာ့အလှကို ထည်ထည်ဝါ၀ါပြနိုင်မည့်ကျွန်းစုကြီးတစ်စုအတွက် မဲပေးကြဖို့ လှုပ်ဆော်နေတာပါဗျား။

ကျွန်းစုပေါင်း (၂၀၀)ကျော် (၀က်ဘ်ဆိုဒ်စွယ်စုံအဘိဓာန်အလိုအရ=၈၀၀-ကျော်) နဲ့ဖွဲ့စည်းထားတဲ့ မြန်မာနိုင်ငံတောင်ဘက်စူးစူးက Mergui Archipelago ခေါ် မြိတ် (ဘိတ်) ကျွန်းစုကြီးအတွက် မဲပေးကြဖို့ ကျနော်ပန်ကြားလိုပါတယ်။ ဘာကြောင့်ပေးရသလဲ ဆိုတော့ New 7-Wonders လို့အမည်ပေးထားတဲ့ ကမ္ဘာ့အံ့ဘွယ်အသစ် ခုနှစ်မျိုးကို အခုလာမည့် ခရစ်နှစ်၂၀၁၁-မှာ အပြီးရွေးချယ်ပြီး စာရင်းထုတ်ပြန်မှာဖြစ်ပါတယ်။ ရွေးချယ်ခံရတဲ့ ဒေသအသီးသီးဟာ ကမ္ဘာကျော်အံ့ဘွယ်တစ်ပါးအဖြစ်သတ်မှတ်ခံရပြီး သက်ဆိုင်ရာနိုင်ငံသူနိုင်သားများက အဲဒီအတွက် ဂုဏ်ယူဝင့်ကြွား နိုင်ကြမှာဖြစ်ပါတယ်။

အဲဒီ အံ့ဘွယ် (၇)ပါးထဲမှာ ၀င်ရောက်ယှဉ်ပြိုင်နိုင်တဲ့နေရာပေါင်း (၂၆၁)ခုကို (ကျနော်လိုက်ရေကြည့်တာ-၂၅၈-ခုပဲရတယ်။ ၃-ခု ပျောက်နေတယ်။ ရှာပေးကြပါဦး။) ကမ္ဘာ့တိုက်ကြီး (၇)တိုက်ရှိ နိုင်ငံအသီးသီးမှ ရွေးချယ်သတ်မှတ်ပေးထားပါတယ်။ ရွေးချယ်ထားတဲ့ နေရာတွေကို အောက်ပါအတိုင်း အုပ်စု (၇)မျိုးဖွဲ့စည်းပြီး ဖေါ်ပြထားပါတယ်။
(၁) လွင်ပြင်ကျယ်ကြီးများနှင့် ရေခဲပုံဆောင်များ (စုစုပေါင်း=၂၀-ခု)
(၂) ကျွန်းများ (စုစုပေါင်း= ၃၀-ခု)
(၃) တောင်နှင့် မီးတောင်များ (စုစုပေါင်း= ၃၇-ခု)
(၄) လှိုင်ခေါင်း၊ ကျောက်ပုံဆောင်နှင့် ခြိုက်ဝှမ်းများ (စုစုပေါင်း= ၃၀-ခု)
(၅) သစ်တောများ၊ အမျိုးသာဥယျာဉ်ကြီးများနှင့် သဘာဝထိမ်းသိမ်းနယ်မြေများ (စုစုပေါင်း= ၅၆-ခု)
(၆) အင်းအိုင်ကြီးများ၊ မြစ်များနှင့် ရေတံခွန်များ (စုစုပေါင်း= ၆၀-ခု) နဲ့
(၇) လှပသောပင်လယ်ဒေသများ (စုစုပေါင်း= ၂၅-ခု) ဖြစ်ကြပါတယ်။

အဲဒီအုပ်စု (၇)မျိုးထဲက ကျနော်တို့မြန်မာနိုင်ငံပိုင်မြိတ်ကျွန်းစုကြီးကတော့ အမှတ် (၂) ဖြစ်တဲ့ ကျွန်းအမျိုးအစား စုစုပေါင်း-(၃၀)အနက် နံပါတ်(၂၂) နေရာက ပါဝင်ပါတယ်။ အနိုင်ရဖို့အရေး နိုင်ငံသားတိုင်း တာဝန်သိသိနဲ့ မဲပေးကြရမှာဖြစ်ပါတယ်။ အခုပေးရမည့်မဲကတော့ ပြိုင်ပွဲဝင်နေရာပေါင်း (၂၆၁)ခုအနက် ဆန်ခါတင် (၇၇)-ခု ထဲမှာပါဝင်ရေးအတွက် ပေးကြရမှာပါ။ ဒီအတွက် ၂၀၀၉၊ ဇူလိုင်လအထိ အချိန်သတ်မှတ်ပေးထားပါတယ်။ ဇူလိုင်မကုန်ခင်ပေးကြရမှာဖြစ်တဲ့အတွက် ဆက်နွယ်ရာမြန်မာပြည်သူတို့ဆီ အကြောင်းကြားပြီး မဲပေးဖို့ တိုက်တွန်းကြစေလိုပါတယ်။ အဲဒီ ပထမအဆင့်ဆန်ခါတင် (၇၇)-ခုထဲမှ ဒုတိယအဆင့်ဆန်ခါတင် (၂၁)-ခုကိုထပ်မံရွေးချယ်မှာဖြစ်ပြီး အဲဒီ (၂၁)-ခုထဲမှာမှ နောက်ဆုံးဆန်ခါတင် (၇)-ခုကို ရွေးချယ်မှာဖြစ်ပါတယ်။ အဲဒီ (၇)-ခုဟာ လာမည့် ၂၀၁၁-ခုမှစတင်ပြီး ကမ္ဘာ့အံဘွယ်အသစ်ခုနှစ်ပါး ဖြစ်လာကြမှာပါ။

မဲပေးရမည့်ပုံစံ

မဲပေးရမည့်ပုံစံကို ကျနော်တင်ပြလိုပါတယ်။ လူအတော်များများဟာ အလွယ်တကူမဟုတ်ရင် (ပျင်းတာနဲ့) မလုပ်ဖြစ်ကြတာများပါတယ်။ ကျနော်လဲ အဲဒီအကျင့်ရှိလို့ ပြောတာပါ။ (အဟဲ--ကိုယ့်ပေတံနဲ့ တိုင်းသလိုတော့ဖြစ်နေပြီ၊ ခွင့်လွှတ်တော်မူကြပါဗျား။ အဲလိုပြောတာ အကျင့်ပါနေလို့။)

(၁) www.new7wonders.com ထဲ ၀င်လိုက်ပါ။

(၂) Window ပွင့်သွားတဲ့အခါ Vote Now 7-Wonders of Nature ဆိုတဲ့စာတန်း ဖူဂျီတောင်နောက်ခံထားပြီး ပေါ်လာပါ့မယ်။ အဲဒီထဲမှ Vote Here ဆိုတဲ့ အ၀ါရင့်ရောင် စာတမ်းလေးကို Click လိုက်ပါ။

(၃) Window ပွင့်သွားတဲ့အခါ ကမ္ဘာ့မြေပုံနဲ့ မဲပေးပုံအဆင့်ဆင့်ပြထားတဲ့ ဇယားပါတဲ့ အင်တာနက်စာမျက်နှာပေါ်လာပါ့မယ်။ အဲဒီပုံတွေအထက်မှာရှိတဲ့ စာကြောင်းတွေထဲက Vote Now ဆိုပြီး အ၀ါရင့်ရောင်နဲ့ရေးထားတဲ့ စာတမ်းကို Click လိုက်ပါ။

(၄) ပေါ်လာတဲ့ ၀င်းဒိုးစာမျက်နှာမှာ ပြိုင်ပွဲဝင်ဒေသတွေရွေးချယ်ပုံကိုပြတဲ့ ဇယားနဲ့ အဲဒီအောက်က မိမိရဲ့ E-mail Address ကို ရိုက်ထည့်ရမည့် အထက်/အောက် လေးထောင့်ကွက်အရှည်နှစ်ခုပေးထားပါတယ်။
(၄/က) အဲဒီထဲမှာ ကိုယ့် E-mail Address ကို မှန်မှန်ကန်ကန်ရိုက်ထည့်ပါ။
(၄/ခ) အဲဒီနောက် အောက်မှာပါတဲ့ အကွက်ရှည် (၇)-ခုကို တစ်ခုစီ၊ တစ်ခုစီ Click လိုက်တဲ့အခါ ကမ္ဘာ့တိုက်ကြီး ခြောက်ခုပေါ်လာပါ့မယ်။ မိမိမဲပေးချင်တဲ့ တိုက်ကို ရွေးပါ။ အဲဒီလိုရွေးလိုက်တဲ့အခါ နောက်ထပ် အကွက်ရှည်တစ်ခု ထပ်ပေါ်လာပါ့မယ်။ အဲဒီအကွက်ထဲမှာတော့ တိုက်အလိုက်ရှိတဲ့ ပြိုင်ပွဲဝင်ဒေသအသီးသီးပါဝင်ပါတယ်။ မိမိမဲပေးချင်တဲ့ ဒေသကို ရွေးလိုက်ပါ။ အကွက်တစ်ခုထဲရှိ တိုက်ကြီးတစ်ခုကို ရွေးလိုက်တိုင်း အဲဒီအောက်က ပြိုင်ပွဲဝင်နေရာတွေပါတဲ့အကွက်အသစ်တစ်ခုတစ်ခု ပေါ်လာတာကြောင့် စုစုပေါင်း (၁၄) ကွက်တိတိ ဖြည့်ရမှာဖြစ်ပါတယ်။ အသစ်ပေါ်လာတဲ့ အကွက်တွေထဲက ရွေးပြီးသားဒေသကို ပြန်ရွေးလို့မရတာကိုလဲ သတိပြုပါ။
(၄/ဂ) အထက်က အကွက်(၁၄)ခုလုံးကို (Asia တိုက်နဲ့ Mergui Archipelago ဆိုတဲ့ဒေသပါဝင်စေလျှက်) ပြိုင်ပွဲဝင် တိုက်တူ/ဒေသကွဲ (သို့မဟုတ်) တိုက်ကွဲ/ဒေသကွဲ ခြားနားမှုရှိအောင်ရွေးချယ်ပြီးနောက် အဲဒီအောက်ကြပ်ကြပ်မှာ Anti Spam ဆိုတဲ့ စာတမ်းနောက်က အကွက်ရှည်တစ်ခုပေးထားပါတယ်။ အဲဒီထဲမှာ ကွက်ရဲ့အထက်က ဖြူနီပြာဝါ ရောင်စုံဖြာတဲ့ စာလုံးတွေပေးထားပါတယ်။ အဲဒီစာလုံးတွေကို အကွက်ထဲမှာ မှန်မှန်ကန်ကန်ရိုက်ထည့်ရမှာဖြစ်ပါတယ်။ တကယ်လို့ ပေးထားတဲ့စာလုံးက မရှင်းလင်းဘူးဆိုရင် အကွက်နောက်မှာ မျှားကောက်နှစ်ခု စက်ဝိုင်းပုံပေးထားပါတယ်။ အဲဒီမျှားကိုနှိပ်လိုက်ရင် စာလုံးပုံစံတွေ ပြောင်းပြောင်းသွားမှာဖြစ်ပါတယ်။ ကိုယ့်အတွက် အရှင်းလင်းဆုံးဖြစ်တဲ့ စာလုံးတွေကို ရွေးချယ်ပြီး ဖြည့်ထည့်နိုင်ပါတယ်။ ရှင်းတယ်နော်။
(၄/ဃ) အဲဒီနောက် မဖြစ်မနေ (Mandatory) လုပ်ရမည့်အလုပ်တစ်ခုကတော့ ဖြည့်ထားတာတွေကို မှန်/မမှန်သေချာအောင်ပြန်စစ်ပြီး သေချာပြီဆိုတာနဲ့ အနီရောင်လေးထောင့်ကွက်ထဲမှာရေးထားတဲ့ Submit ဆိုတဲ့ စာလုံးကို Click လိုက်ပါ။

(၅) Submit ကို Click လိုက်တဲ့အခါ ဖြည့်ထားတဲ့အချက်အလက်တွေမှန်ကန်ရင် Window အသစ်တစ်ခုပေါ်လာပါ့မယ်။ အချက်အလက်တွေမမှန်ရင်တော့ ပြန်ပြင်ခိုင်းပါလိမ့်မယ်။ အသစ်ပေါ်လာတဲ့ဝင်းဒိုးစာမျက်နှာမှာ---
(၅/က) ကိုယ့်ရဲ့ First Name စသည်ကို တောင်းတဲ့ အကွက်ရှည်လေးတွေ ပေးထားပါတယ်။ တောင်းတဲ့အတိုင်း မှန်မှန်ကန်ကန်ဖြည့်ထည့်ပါ။
(၅/ခ) ကွက်လပ်တွေဖြည့်ပြီးတဲ့အခါ အောက်ဆုံးမှာ “New 7-Wonders နဲ့ပတ်သက်တဲ့ ဝေါဟာရတွေနဲ့ အနေအထားတွေကို သဘောတူကြောင်းပြောရတဲ့ လေးထောင့်ကွက်လေးတစ်ခုနဲ့ သက်ဆိုင်ရာ သတင်းအချက်အလက်တွေကို ပို့ပေးရင်လက်ခံ/မခံမေးထားတဲ့ လေးထောင့်အကွက်လေးတစ်ခုကို ပေးထားပါတယ်။ အဲဒီအကွက်တွေကိုလဲ Tick လိုက်ပါ။ မဖြည့်ချင်လဲ သဘော။
(၅/ဂ) အဲဒါပြီးရင် အောက်မှာ ၀င်းဒိုးစာမျက်နှာ (၄)တုန်းက ဖြည့်ထားတဲ့ အကွက် (၁၄)ခုတွေ့ပါ့မယ်။ ဖြည့်ပြီးသားမို့ ထပ်ဖြည့်စရာမလိုပါ။
(၅/ဃ) အဲဒီအောက်က Anti Spam ဆိုတဲ့စာနဲ့ စာလုံးတွေရိုက်ထည့်ရတဲ့ အကွက်ရှည်တစ်ခုထပ်ပေးထားပါတယ်။ စာမျက်နှာ (၄)မှာတုန်းကအတိုင်း မှန်မှန်ကန်ကန် ဖြည့်ထည့်လိုက်ပါ။
(၅/င) အဲဒီနောက် အောက်မှာပေးထားတဲ့ အနီရောင်ကွက်ထဲက Submit ကို Click လိုက်ပါ။

(၆) ဖြည့်ထားတဲ့အချက်အလက်တွေ မှန်ကန်လို့ ၀င်းဒိုးအသစ်ပွင့်သွားတဲ့အခါ တိုက်ရွေးချယ်ပုံနဲ့ ဒေသရွေးချယ်ပုံကို ပြထားတဲ့ ဇယားပါတဲ့ စာမျက်နှာပေါ်လာပါတယ်။ အဲဒီဇယားကို ဘာမှလုပ်စရာမလိုပါ။ အဲဒီဇယားအောက်မှာ “Thank you for participating in the second voting stage for the New7Wonders of Nature. To finalize your votes, please check your mailbox and confirm by clicking the link provided”. ဆိုတဲ့စာတမ်းတစ်ခုနဲ့ သင့်ကို ကျေးဇူးတင်ကြောင်း၊ သင့် E-mailbox ကို သွားရောက် Checking လုပ်ဖို့လိုကြောင်းပြောထားပါတယ်။ ဒါကြောင့်---

(၇) အထက်ပါ အဆင့်ခြောက်ဆင့်ကို အောင်အောင်မြင်မြင်ပြီးဆုံးသွားတဲ့အခါ သင့် E-mailbox ထဲကို သက်ဆိုင်ရာကနေပြီး သင်ပေးလိုက်တဲ့ မဲကို လက်ခံရရှိကြောင်းအသိပေးတဲ့ Confirmation Letter ပို့ပေးထားမှာဖြစ်ပါတယ်။ ဒီလောက်နဲ့ သင့်ရဲ့ မဲပေးခြင်းကိစ္စမပြီးသေးပါ။ ပို့ထားတဲ့ Mail ကိုဖွင့်လိုက်ပါ။ http://www.new7wonders.com/key/313561ea8d7743200ec21318ba063cc0/ ဆိုတဲ့ Link တစ်ခုပေးထားတာ တွေ့ပါလိမ့်မယ်။ အဲဒီ Link ကို Click လိုက်ပါ။

(၈) Your votes for your New7Wonders of Nature nominees have now been successfully counted. ဆိုပြီးတော့ သင့်ရဲ့ မဲပေးခြင်းကိစ္စပြီးစီးအောင်မြင်ကြောင်း အသိပေးတဲ့စာတမ်းတစ်ခုပေါ်လာပါ့မယ်။ ဒါဆိုရင် သေချာပေါက် အောင်အောင်မြင်မြင် မဲပေးပြီးပြီလို့ တထစ်ချမှတ်ယူ နားလည်လိုက်ပါတော့။

ဟူး---ပြောရတာလဲ မောလိုက်တာ။ အထက်မှာ ကျနော်တင်ပြခဲ့တဲ့ အစီအစဉ်အတိုင်းသာ မဲပေးကြပါတော့လို့ နောက်ဆုံးပြောလိုက်ပါရစေ---ခင်ဗျား။

မှတ်ချက်။
Email Address တစ်ခုရှိရင် တစ်မဲပေးနိုင်တဲ့အတွက် တစ်ခုထက်ပိုရှိသူများကလဲ မိမိတို့မှာ ရှိသလောက် Address တွေနဲ့ များနိုင်သမျှများအောင် ပေးလို့ရပါတယ်။ လိပ်စာမထပ်ဖို့ပဲ အရေးကြီးပါတယ်။ အင်ဒိယစတဲ့ သူများနိုင်ငံကလူတွေလဲ သူတို့နိုင်ငံအတွင်းရှိ ပြိုင်ပွဲဝင်နေရာတွေ အနိုင်ရဖို့အရေး အသည်းအသန်လုံးပန်းနေကြပါပြီ။ ဒီလို လုံးပန်းတဲ့နေရာမှာ အင်ဒိယနိုင်ငံဟာ လူဦးရေသန်းတစ်ထောင်နီးပါးရှိပြီး လူတိုင်းလောက်နီးပါး အင်တာနက်သုံးနိုင်ရုံမျှမက မဲပေးဝါသနာပါကြတဲ့ ဒီမိုကရေစီနိုင်ငံကြီးသားများဖြစ်ကြသည့်အလျောက် ဒီလိုကိစ္စမျိုးတွေမှာ သူတို့နေရာ ရှေ့တန်းရောက်ဖို့အရေး သူဦးငါအရင် မဲပေးကြပါတယ်။ ဒါကြောင့် အတော်အသင့်လောက်သာအံ့ဘွယ်ရာဖြစ်တဲ့ Taj Mahal သင်္ချိုင်းဂူကြီးဟာ ယနေ့ ကမ္ဘာ့အံ့ဘွယ်ခုနှစ်ပါး စာရင်းထဲက မပြုတ်သေးတာပါ။

တကယ်တော့ ကမ္ဘာပေါ်မှာ အဲဒီဂူကြီးထက် အံ့သြဘွယ်ကောင်းတဲ့အရာတွေ ရေတွက်လို့တောင် ကုန်အံ့မထင်ပါဘူး။ သူတို့က လူဦးရေများပြီး ရှိသလောက်မဲပေးနိုင်ကြလို့သာ သူတို့နိုင်ငံရှိ သင်္ချိုင်းဂူကြီး ကမ္ဘာ့စာမျက်နှာရှေ့တန်းမှာ နေရာယူနေနိုင်ခြင်းဖြစ်ပါတယ်။ ကျနော်တို့နိုင်ငံကတော့---
(၁) မီဒီယာလောကဆင်းရဲခြင်း၊
(၂) လူဦးရေနည်းပါးခြင်း၊
(၃) သတင်းကြပ်မတ်ခြင်း၊
(၄) အာဏာရှင်လက်အောက်မှာကြီးပျင်းရသူများပီပီ မဲပေးခြင်းကိစ္စအပေါ် စိတ်ဝင်စားမှုနည်းပါးခြင်း စတဲ့အားနည်းချက်တွေကြောင့် အံ့ဘွယ်ကောင်းလောက်အောင် လှပလွန်းတဲ့ မြန်မာ့မြေပေါ်က နေရာအတော်များများဟာ ကမ္ဘာက အသိအမှတ်အပြုခံရတဲ့အဆင့်မရောက်ခဲ့ပါဘူး။ ဒါပေမဲ့ ယနေ့ခေတ်မှာတော့ နိုင်ငံအတွင်း တင်းကြပ်ပေမဲ့ နိုင်ငံ့အပြင်ဘက်ရောက်နေတဲ့ ပြည်ချစ်ရွှေမြန်မာတွေဟာ သန်းချီရှိနေပါပြီ။ အဲဒီမြန်မာတွေအားလုံး တက်ညီလက်ညီနဲ့ ၀ိုင်းဝန်းမဲပေးလိုက်ကြမယ်ဆိုရင် ကျနော်တို့နိုင်ငံက မြိတ်ကျွန်းစုကြီးဟာ နောက်ဆုံးအံ့ဘွယ်ခုနှစ်ပါးစာရင်းမှာ မပါနိုင်တောင် ဆန်ခါတင်ပထမအဆင့်ဖြစ်တဲ့ (၇၇)-ခု စာရင်းမှာတော့ ပါဝင်လာနိုင်ကြောင်း အသိပေး နှိုးဆော်လိုက်ရပါတယ် ခင်ဗျား။