အညာသားလေးများ

မြန်မာလူမျိုးများ ဆိုရိုးပြုနေကျ စကားတစ်ခွန်းရှိသဗျာ့ “သံပုရာသီးလို ကြီးလေ ချဉ်လေပဲ” တဲ့။ ဒီစကားကို ဘယ်နေရာမှာ သုံးလဲဆိုတာ စာဖတ်သူတို့သိပြီးသားမို့ ထပ်မပြောတော့ပါ။ ဒါပေမဲ့ သိပံ္ပခေတ်ကြီး တိုးတက်ထွန်းကားလာတာနဲ့အမျှ ချဉ်တဲ့ သံပုရာသီးတွေလဲ ချိုကုန်ပါပြီ။ မြန်မာပြည်မှာ နေတုန်းက အင်္ဂလိပ်စာသင်တဲ့ကျောင်းသားတစ်ယောက်က သံပုရာအချိုသီးတွေ ယူလာပြီး မကြာခဏကျွေးတာ စားခဲ့ရဖူးတယ်။ မြန်မာရာဇ၀င်မှာလည်း ဖတ်ဖူးသမို့လား၊ ကျန်စစ်သားရဲ့ အရိန္ဒမာလှံနဲ့ထိုးလိုက်ရင် ချဉ်တဲ့အသီးတွေအားလုံး ချိုသွားတယ်ဆိုတာလေ။

မြန်မာလူမျိုးအသိုင်းအ၀ိုင်းမှာ သက်ဆိုင်ရာ လူကြီးမိဘဆရာသမားတွေက ကလေးငယ်တွေကို မလိမ်ဖို့မညာဖို့ ဆုံးမသွန်သင်လေ့ရှိကြတယ်။ အလွန်ကောင်းမွန်တဲ့ အလေ့အထ တစ်ခုပေါ့ဗျား။ ဒါပေမဲ့ ဆိုးတဲ့ကလေးတွေကတော့ ဒီလောက်သွန်သင်ဆုံးမနေတဲ့ကြားထဲက ရအောင်ဆိုးနေကြတုန်းပေါ့။ ဆိုးမှာပေါ့၊ ကလေးပေပဲကိုး။ အချို့ကလေးများကျတော့လည်း လူကြီးတွေက ဘာမှမပြောရပဲနဲ့ကို ကောင်းနေကြတာ တွေ့ဖူးပါရဲ့။ ဒီတော့ မေးခွန်တစ်ခုက “ကလေးတစ်ယောက်ဆိုးခြင်း/ကောင်းခြင်းဆိုတဲ့ ပြဿနာဟာ လူကြီးမိဘတွေရဲ့ ဆုံးမသွန်သင်မှုနဲ့ တိုက်ရိုက်သက်ဆိုင်သလား” ဆိုတာပါပဲ။ ကလေးတစ်ယောက်ရဲ့ ကောင်းခြင်း/ဆိုးခြင်းဖြစ်ဖို့အရေး ဗီဇနဲ့ ပတ်ဝန်းကျင်ဟာ ဘယ်အတိုင်းအတာအထိ အရေးပါသလဲ ဆိုတာကိုလဲ ပညာရှင်များ အကြိမ်ကြိမ်ဆွေးနွေးခဲ့ကြပါပြီ။

အနောက်တိုင်းက မနုဿဗေဒပညာရှင်တွေကတော့ ကလေးငယ်တွေရဲ့ ဒီပြဿနာကို သိပံ္ပနည်းကျလေ့လာကြပါတယ်။ အဲဒီလေ့လာချက်အရ ထွက်လာတဲ့ အဖြေတစ်ခုကတော့ “The more plausible the lie, the more quick-witted they will be in later years and the better their abiliy to think on their feet.” ဆိုပဲဗျား။ “ကလေးငယ်တွေဟာ ယုတ္တိရှိရှိညာတတ်လေလေ နောက်ပိုင်းသူတို့ကြီးပြင်းလာတဲ့အခါ ပိုမိုဉာဏ်သွက်လေလေဖြစ်ပြီး ကိုယ်ပိုင်စဉ်းစားနိုင်တဲ့စွမ်းရှည်သတ္တိ ပိုကောင်းလေလေပါပဲ” တဲ့။ ဟုတ်၏/ မဟုတ်၏ကိုတော့ ကိုယ်မွေးထားတဲ့ကလေးတွေကိုပဲ ပြန်ကြည့်ကြပေတော့။

ဒီစူးစမ်းလေ့လာမှုကို လုပ်ခဲ့ကြတာကတော့ ကနေဒါနိုင်ငံ၊ တိုရန်တိုတက္ကသိုလ်၊ ကလေးငယ်လေ့လာရေးသိပံ္ပဌာနက ညွှန်ကြားရေးမှူး Dr Kang Lee ဦးဆောင်တဲ့ ကနေဒါပညာရှင်အဖွဲ့ပါ။ ဒီအဖွဲ့ကနေပြီးတော့ အသက် (၂) နှစ်ကနေ (၁၆) နှစ်အထိ ကလေးငယ်ပေါင်း (၁၂၀၀) ကို သေသေချာချာလေ့လာခဲ့ကြပါတယ်။ သူတို့လေ့လာချက်အရ ကလေးငယ်တွေဟာ အသက် (၂)နှစ်အရွယ်မှာ (၂၀)ရာခိုင်နှုံး လိမ်တတ်ကြပါသတဲ့။ အသက် (၃)နှစ်အရွယ်ကလေးတွေကတော့ ရာခိုင်နှုံး (၅၀) လောက်ကို လိမ်တတ်ကြဆိုပဲ။ အဲ---အသက်(၄) နှစ်ရောက်လာရင်တော့ သူတို့ရဲ့ လိမ်တတ်တဲ့ ရာခိုင်နှုံးဟာ (၉၀) အထိရှိသွားပြီး ရာခိုင်နှုံးပြည့်လောက်နီးပါး လိမ်တတ်တဲ့ အရွယ်ကတော့ အသက် (၁၂)နှစ်တဲ့ဗျား။ ဒီအရွယ်ရောက်လာရင် ကလေးအားလုံးလောက်နီးပါး ညာတတ်ကြပါသတဲ့။

ဒါပေမဲ့ ကလေးဘ၀မှာ ဒီလိုလိမ်တတ်တာဟာ အသက်ကြီးလာတဲ့အခါ အဆိုးဘက်ထက် အကောင်းဘက်ကို ပိုမိုဦးတည်စေတယ်လို့ သိပံ္ပပညာရှင်တွေက ဆိုပါတယ်။ ဒေါက်တာခန်းလီက “မိဘလုပ်သူတွေဟာ ကိုယ့်ကလေး လိမ်ညာပြီးစကားပြောတတ်တဲ့အကျင့်ရှိတဲ့ကိစ္စအပေါ် မစိုးရိမ်သင့်ပါဘူး၊ ကလေးအားလုံးဟာ လိမ်တတ်ကြတာချည်းပါပဲ၊ ဉာဏ်ရည်ဉာဏ်သွေးဖွံ့ဖြိုးတဲ့ကလေးတွေဟာ ပိုပြီး အလိမ်တော်တတ်ပါတယ်။ ဘာ့ကြောင့်လဲဆိုတာ့ သူတို့ဟာ သူတို့ပြောတဲ့စကားလမ်းကြောင်းကို ဖုံးဖိနိုင်ကြလို့ပါပဲ၊ သူတို့ကြီးပြင်းလာတဲ့အခါ (အဲဒီအစွမ်းအစကြောင့်ပဲ) သူဌေးကြီးတွေ ဖြစ်လာနိုင်ပါတယ်” လို့မှတ်ချက်ပြုခဲ့ပါတယ်။

သိပံ္ပသုတေသနပြုချက်အရ “လိမ်ညာမှုထဲမှာ သူတို့အကျိုးအစီးအပွါးအတွက် အချက်အလက်ကို ထိမ်းချုပ်နိုင်မှု၊ သတင်းအရင်းအမြစ်တွေကို ပေါင်းစပ်နိုင်မှုမျိုးလို ဦးဏှောက်ကို အလုပ်ပေးစေတဲ့ စွမ်းရည်တွေ အမြောက်အများ ပါဝင်နေတယ်” လို့ဆိုပါတယ်။ ဒီလိုပါဝင်နေမှုကြောင့် ကလေးတွေရဲ့ ဦးဏှောက်ဟာ ပိုမိုဖွံ့ဖြိုးလာပြီး အရေးကြီးတဲ့လုပ်ဆောင်မှုတွေ၊ ယုတ္တိရှိရှိနဲ့ စနစ်တကျတွေးတော့ကြံဆတတ်မှုတွေပါ ဖြစ်လာရပါတယ် ဆိုပဲ။ နောက်ပြီး သုတေသနပညာရှင်တွေ ဆက်ပြောတာက “ကလေးငယ်ဘ၀မှာ ဒီလိုလိမ်တတ်တဲ့အကျင့်ဟာ နောက်ပိုင်းကြီးပြင်းလာတဲ့အခါ စာမေးပွဲခိုးဖြေတာတို့ လူဆိုးလူလိမ်ဖြစ်တာတို့နဲ့ ဘာမှမဆိုင်ပါဘူး” တဲ့။

ကဲ--အဲဒီတော့ ကလေးရှိတဲ့ မိဘများ ကိုယ့်ကလေး လိမ်ညာတတ်တဲ့အကျင့်ရှိနေရင် အသာလွှတ်ထားလိုက်ကြဗျာ၊ တစ်ခုတော့ ရှိတယ်နော်၊ အဲလိုလွှတ်ထားလိုက်ပြန်ရင်လည်း သံပုရာသီးလို ဖြစ်သွားမှာလည်း စိုးရသေးတယ်။ ဒါဆိုရင်တော့ မပူနဲ့၊ အရိန္ဒမာလှံနဲ့သာ ထိုးလိုက်၊ တစ်ခါတည်း ချိုသွားစေရမယ်။